DOKII AWAKUMBUKA ''BODABODA''

Msanii nyota wa filamu na muziki wa injili, Ummy Wenceslaus 'Dokii' sasa ameamua kutumia umaarufu wake kupunguza ajali zitokanazo na pikipiki kupitia taasisi yake ya Tanzania Women Entertaiment ambapo mwishoni mwa wiki aligawa zawadi kadhaa katika tamasha alilowaandalia madereva wa chombo hicho liitwalo 'Dokii Boda Kibajaji Festival'.

Akizungumza baada ya kumalizika kwa tamasha hilo lililofanyika kwenye viwanja vya Leaders Club, Kinondoni jijini Dar es Salaam, Dokii aliyewahi kung'ara katika tamthilia mbalimbali zilizokuwa zikirushwa kupitia kituo cha luninga cha ITV, alisema kuwa nia yake ni kutumia uzoefu wake katika sanaa ili kuwahamasisha madereva wa bodaboda kuzijua sheria na kuzifuata.

"Ajali nyingi zinazotokea barabarani hivi sasa zimekuwa zikiwahusisha madereva wa bodaboda. Nimeamua kushirikiana na wadau ili kuwahamasisha wajifunze sheria za barabarani na kuzizingatia ili kuwapunguzia matukio ya ajali zinazoepukika," alisema Dokii.

Katika tamasha hilo ambalo lilihusisha pia shindano la kumsaka dereva bora wa bodaboda, washindi kutoka kila wilaya jijini Dar es Salaam walikuwa ni madereva Ismail Mohamed wa Ilala, Amir Mlamu (Temeke) na Kaiwanga Rajab wa Kinondoni. Kila mmoja miongoni mwa washindi hao alipata zawadi ya pikipiki aina ya Fekon na waliozikabidhi walikuwa ni Dokii na msanii nyota wa bongofleva, Juma Nature.