MADEREVA BODABODA WAPIMANA NGUVU NA POLISI MWANZA

Jana Jiji la Mwanza kwa takribani saa mbili lilitikiswa na milio ya mabomu ya kutoa machozi na risasi za moto wakati askari wa Kikosi cha Kutuliza Ghasia (FFU) walipokuwa wakiwatawanya madereva wa pikipiki za abiria maarufu kama bodaboda.

Madereva hao walikuwa wakifanya vurugu kupinga hatua ya askari wa Kikosi cha Usalama Barabarani kukamata pikipiki zao kwa madai kuwa wanakiuka sheria na taratibu.

Operesheni ya kukamata pikipiki hizo ilianza juzi, lakini jana madereva hao wanaodai kuwa wanaonewa, walikosa uvumilivu na kutumia nguvu kupinga kwa kujikusanya barabarani
wakitaka kuwadhuru askari wa usalama barabarani.

Kamanda wa Polisi Mkoa wa Mwanza, Ernest Mangu, aliwaambia waandishi wa habari jijini hapa jana kuwa tukio hilo lilitokea saa 3:30 asubuhi katika eneo la Misheni kwenye barabara ya kuelekea Uwanja wa Ndege.

Alisema kwamba baadhi ya askari wake walikuwa katika operesheni maalum ya kukamata madereva wa vyombo vya usafiri wasiozingatia sheria za usalama barabarani.

Kwa mujibu wa Kamanda Mangu, operesheni hiyo ilianza tangu juzi na kwa siku ya kwanza ilifanyika kwa ufanisi mkubwa pasipo vikwazo vyovyote.

Hata hivyo, alisema jana askari walijielekeza zaidi katika kuwakamata madereva ambao wanaendesha bodaboda pasipokuwa na leseni au kofia ngumu (helmet) na wale wanaopakia abiria zaidi ya mmoja maarufu kama mishikaki.

Aidha, alisema kwamba operesheni hiyo kwa jana ililenga pia madereva wa bodaboda wenye tabia ya kuendesha upande wa kushoto mwa barabara wanakopita waenda kwa miguu na hivyo kusababisha ajali za mara kwa mara.

“Ni kweli kwamba tumekuwa na operesheni maalum ya kukamata madereva wanaovunja sheria za usalama barabarani na leo (jana) tulijielekeza zaidi kwa madereva wa bodaboda, na tayari jumla ya pikipiki 26 zilikuwa zimekamatwa,” alisema.

Aliongeza kwamba kati ya pikipiki 26 zilizokuwa zimekamatwa, madereva 10 waliopatikana na makosa walikubali kulipa faini na kuachiwa.

Hata hivyo, alisema wakati zikiwa zimebaki pikipiki 16, ghafla lilizuka kundi kubwa la madereva wenye pikipiki na kuwazunguka askari, kupiga kelele za honi na kufunga barabara hali iliyosababisha usumbufu kwa watumiaji wengine wa barabara na shughuli kusimama kwa takribani saa mbili kutokana na vurugu hizo.

Kadhia hiyo iliwakumba wakazi wanaoishi maeneo ya barabara ya Uwanja wa Ndege kuanzia Kliniki, Nela, Misheni hadi Ghana baada ya madereva hao kuifunga.

Kufuatia hali hiyo, Kamanda Mangu alisema kwamba askari waliokuwapo walilazimika kuomba msaada na walitumwa FFU ambao baada ya kufika wenye pikipiki walianza kuwarushia mawe, ndipo nao wakawatawanya kwa kurusha mabomu ya kutoa machozi.

Hata hivyo, ushahidi wa picha ya video umemuonyesha mmoja wa askari hao wa FFU akirusha hewani risasi kadhaa za moto na kusababisha hofu kubwa miongoni mwa wapita njia na wananchi wanaofanya shughuli zao eneo la Misheni.

Kutokana na vurugu hizo, Kamanda huyo alisema kuwa watu wanane walitiwa mbaroni pamoja na pikipiki 13 ambazo wahusika walizitelekeza na kukimbia wakati wakitawanywa na askari wa FFU.   Hata hivyo, alisema hakuna mtu aliyepata majeraha makubwa, isipokuwa mikwaruzo midogo kwa askari wake, hali ambayo alisema ni ya kawaida katika zoezi kama hilo.

Pamoja na kuzuka kwa ghasia hizo, alisema kuwa Jeshi la Polisi litaendelea na operesheni hiyo kwa wiki nzima ili kuhakikisha madereva wanatii sheria za usalama barabarani kwa lengo la kupunguza ajali zinazoepukika.